UM RØÐARAR
Dr. Alexandra Leeper, CEO of the Iceland Ocean Cluster
Framløga: 100% Fiskur: Vegurin frá konsepti til marknað og lønsemi
Alexandra er stjóri í Iceland Ocean Cluster og brennur fyri leiðslu, ið stuðlar burðardyggari gagnnýtslu av havtilfeingi. Hon hevur eina vinnu-Ph.d. í alivinnu og ringbúskapi í samstarvi við Matís og Norwegian University of Life Sciences.
Alexandra er serfrøðingur í íverksetan í bláa- og ringbúskapinum, har hon serliga miðar ímóti burðardyggari virðisøking og at stuðla menningini av Ocean Clusters um allan heim. Hon leggur stóran dent á at sjónliggera kvinnur í íverksetan. Sjálv var hon við til at stovna fyritøkuna, Hringvarmi, ið gagnnýtir spillhita til framleiðslu av mati í stýrdum umhvørvi.
Á ráðstevnuni greiðir Alexandra frá konseptinum, 100% fiskur, har hon lýsir nýggjar vørur úr tilfeinginum og avbjóðingarnar frá hugskoti til marknað og lønsemi.
Dr. Ólafur Ögmundarsson, Associate Professor at Háskóli Íslands
Framløga: Hættir at minka CO2-útlát og aðra neiliga umhvørvis-ávirkan í fiski- og alivinnuni
Ólafur er lektari á Háskóla Íslands og varadekanur fyri fakultetið fyri matvísindi og føðslufrøði. Hann er formaður í undirvísingarnevndini í skúlanum fyri heilsuvísindi og situr í burðardygdarnevndini hjá Háskóla Íslands. Hansara gransking snýr seg í stóran mun um tvørvísindaligar kanningar av umhvørvisligari og búskaparligari burðardygd í sambandi við matvørur og kost. Henda granskingarhugsjón er eisini umboðað í hansara vegleiðing og undirvísing, har høvuðsevnini fevna um lívsringrásgreiningar, matvørukervi, matframleiðslu og heimsmálini hjá ST.
Á ráðstevnuni fer Ólafur at greiða frá, hvussu útlát og onnur neilig umhvørvisávirkan í fiski- og alivinnuni kann minkast. Hann fer eisini at lýsa, hvussu lívsringrásgreiningar verða brúktar at meta um umhvørvisávirkanir á vørur, og hvussu slíkar greiningar kunnu hjálpa okkum at eyðmerkja, hvar í virðisketuni ein minking í umhvørvisávirkan munar best fyri vøruna sum heild.
Jónas R. Viðarsson, Director of the Research Department, Matís
Framløga: Soleiðis stuðlar Matís nýskapan og virðisøking í Sjófeingisvinnum
Jónas er leiðari í granskingareindini fyri matvøru- og biotøkni hjá Matís. Jónas er serfrøðingur í ringbúskapi og matvøruvirðisketum og hevur starvast hjá Matís síðan 2007. Hann hevur drúgvar royndir í altjóða verkætlanum sum samskipari og arbeiðspakkaleiðari og hevur arbeitt nógv við kanningum um umhvørvisávirkanina av fiskivinnuni á sjógvi og landi, umhvørvismerkingum og lívsringrásgreiningum.
Á ráðstevnuni fer Jónas at vísa, hvussu Matís stuðlar nýskapan og virðisøking í sjófeingisvinnum. Eisini fer hann at tosa um samspælið millum gransking og menning í Matís og nýskapan úti í vinnuligum fyritøkum.
Dr. Petter Olsen, Granskari í Nofima
Framløga: Matvørusvik og sporføri: Áttu sporførisskipanir innan sjógæti at verið bygdar á blockchain-tøkni?
Petter starvast sum granskari í Nofima. Hann hevur eina Ph.d. í sporføri frá UiT, Norges arktiske universitet í Tromsø, har hann eisni starvast sum adjungeraður professari. Petter er serfrøðingur í nýtslu av KT í matvøruídnaðinum, serliga til upplýsingarlogistikk, vøruskjalprógving, umhvørvismetingar og sporføri. Hann hevur drúgvar royndir í evropeiskum verkætlanum, bæði sum samskipari og arbeiðspakkaleiðari.
Á ráðstevnuni fer Petter at greiða frá matvørusviki og sporføri og fer at umrøða, í hvønn mun blockchain-tøkni kann betra um sporførisskipanir av sjógæti.
Prof. Michaela Aschan, UiT
Framløga: Eitt broytandi Arktis: Tvørfakligur PhD-skúli í UiT - Eitt nýtt ættarlið av granskarum
Michaela er professari í fiskifrøði og fiskivinnustýring á UiT, Norges arktiske universitet í Tromsø og hevur eina Ph.d. í vistfrøði frá University of Helsinki. Hon er varadekanur á deildini fyri lívfrøði, fiskivinnu og búskap, har hon hevur ábyrgd av at menna vísindaligu strategiina fyri universitetið. Eisini hevur hon ábyrgd av Ph.d.-skúlanum á UiT. Michaela hevur sterkar leiðsluførleikar og drúgvar royndir í tvørvísindaligari gransking. Hon var samskipari á Horizon-verkætlanini, ClimeFish, sum snúði seg um, hvussu veðurlagsbroytingar kunnu ávirka fiski- og alivinnuna í Evropa.
Á ráðstevnuni fer Michaela at greiða frá nýggja Ph.d.-skúlanum í UiT – ‘changing Arctic’, og hvussu skúlin miðar ímóti at skapa eitt nýtt ættarlið av granskarum, sum dugir at arbeiða tvørfakliga við loysnum til avbjóðingarnar í Arktis.
Dr. Unn Laksá, Stjóri í Sjókovanum
Framløga: Ársfrágreiðing Sjókovans um fiskivinnuna 2024
Unn tók í 2020 stig til at stovna Sjókovan, har hon í dag er stjóri. Hon hevur eina Ph.d. í stjórnmálafrøði frá University of Liverpool. Síðan 2013 hevur hon arbeitt við altjóða og føroyskum granskingarverkætlanum innan fiski- og alivinnuna - sum arbeiðspakkaleiðari og samskipari. Unn hevur arbeitt nógv í tvørfakligum samstørvum og hevur breiða vitan um fiski- og alivinnuna. Hon hevur luttikið sum serfrøðingur í fleiri arbeiðsbólkum, bæði í føroyskum og altjóða høpi.
Á ráðstevnuni fer Unn at greiða frá avrikum og framtíðarætlanum hjá Sjókovanum. Hon fer eisini at leggja fram Ársfrágreiðing Sjókovans um fiskivinnuna 2024. Harumframt greiðir hon frá úrslitum í SeaMark- og SmartFisk-verkætlanunum, ið snúgva seg um ávikavist taraaling, og hvussu oljunýtslan í føroyskum fiskiskapi kann minkast.
Dr. Magni Laksáfoss, Búskaparfrøðingur í Sjókovanum
Framløga: Hvussu kunnu vit minka um oljunýtsluna í føroyskum fiskiskapi?
Magni hevur eina Ph.d. í búskaparfrøði frá Roskilde Universitet og hevur arbeitt í Sjókovanum síðan stovnan í 2020. Magni er serfrøðingur í hagfrøði og demografi. Hann hevur granskað nógv í føroyska búskapinum og hevur drúgvar royndir at gera samfelagsbúskaparligar greiningar í evropeiskum, norðurlendskum og føroyskum granskingarverkætlanum.
Á ráðstevnuni fer Magni at greiða frá úrslitum í SeaMark- og SmartFisk-verkætlanunum, sum snúgva seg um ávikavist taraaling, og hvussu oljunýtslan í føroyskum fiskiskapi kann minkast.
Prof. Sveinn Agnarsson, Háskóli Íslands
Framløga: Møguleikar og forðingar at brúka alternativ protein í matvøru- og fóðurframleiðslum
Sveinn er atknýttur granskari í Sjókovanum og professari í búskapi á Háskóla Íslands. Sveinn er serliga stinnur í vinnubúskapi og ekonometri, og hansara gransking fevnir í høvuðsheitum um umsiting av fiskivinnu. Hann hevur givið út meira enn 40 greinar í altjóða tíðarritum og luttikið í nógvum altjóða verkætlanum um fiski- og alivinnu. Umframt at vera formaður í íslendska kappingarráðnum luttók hann fyri stuttum í íslendska serfrøðingabólkinum, sum kom við tilmæli um, hvussu CO2-útlátið í fiskivinnuni kann minkast.
Á ráðstevnuni fer Sveinn at greiða frá úrslitum úr granskingarverkætlanini, NextGenProteins, har hann var arbeiðspakkaleiðari. Verkætlanin hevði til endamáls at kanna møguleikarnar at nýta alternativ protein til matvøru- og fóðurframleiðslu.
Juliana Arias Hansen, Granskari í Sjókovanum
Framløga: Hvørjar loysnir eru til at endurbyggja lívmargfeldi?
Juliana hevur eina MA í altjóða búskapi og menning frá University of Applied Sciences í Berlin - HTW. Hon er stinn í marknaðarkanningum og fíggjar- og búskaparligum greiningum. Juliana hevur drúgvar royndir sum arbeiðspakkaleiðari í evropeiskum Horizon-granskingarverkætlanum, sum viðvíkja fiski- og alivinnu, eitt nú FarFish, Aquavitae og BioProtect.
Á ráðstevnuni fer Juliana at greiða frá BioProtect-verkætlanini, sum hevur til endamáls at menna loysnir til at verja lívmargfeldi í sjónum.
Mirjam Carlsdóttir Olsen, Granskari í Sjókovanum
Framløga: Sjónarmið um uppsjóvarfiskiskap í Norðuratlantshavi
Mirjam hevur útbúgving í altjóða menning frá University of Edinburgh og eina MA í samfelagsvísindi frá Fróðskaparsetri Føroya. Hon hevur verið í starvi hjá Sjókovanum síðan 2023, har hon hevur arbeitt við ymiskum ES-verkætlanum.
Á ráðstevnuni fer Mirjam at greiða frá úrslitum í Horizon-verkætlanini, Marine SABRES, sum hevur til endamáls at gera tað lættari at taka betri atlit til alla vistskipanina og samspælið millum umhvørvi og samfelag í umsitingini av havinum. Mirjam fer at greiða frá sjónarmiðum hjá føroyskum áhugapartum um uppsjóvarfiskiskap í norðuratlantshavi.