Sjókovin 5 ár
Fimm ár eru liðin, síðan Sjókovin varð stovnaður við tí fyri eyga at stimbra burðadygga menning og nýskapan í sjófeingisvinnunum. Vit hátíðarhalda dagin við spennandi ráðstevnu í Varpinum í Klaksvík fríggjadagin 28. mars, har vit viðgera møguleikar og avbjóðingar í fiski- og alivinnuni.
Landsstýrismaðurin í fiskivinnu- og samferðslumálum, Jóhan Christiansen, bjóðar vælkomin. Síðani hugleiðir Unn Laksá, stjóri í Sjókovanum, um virksemið fyrstu fimm árini, og hvat liggur fyri framman. Ársfrágreiðing Sjókovans um fiskivinnuna 2024 verður løgd fram, og síðani er prát við umboð fyri føroyskar granskingarstovnar um, hvussu vit kunnu fáa betri dátur og hagtøl til gransking, og hvønn týdning hetta hevur fyri vitan og menning í sjófeingisvinnum.
Gjøgnum dagin vera fleiri áhugaverdar framløgur frá okkara tættastu samstarvsfeløgum.
Alexandra Leeper frá Iceland Ocean Cluster greiðir frá konseptinum “100% fiskur” - um innovativar vørur úr restrávøru og um avbjóðingar frá hugskoti til marknað og lønsemi.
Jónas R. Viðarsson frá Matís greiðir frá, hvussu Matís stuðlar nýskapan og virðisøking í fiski- og alivinnuni.
Ólafur Ögmundurson frá Háskóla Íslands leggur fram greiningarúrslit um at minka CO2-útlát og aðra neiliga umhvørvisávirkan í fiski- og alivinnuni.
Petter Olsen frá Nofima greiðir frá matvørusviki og sporføri og um blockchain-tøkni sum loysn til sporførisskipanir innan sjógæti.
Michaela Aschan frá UiT fer at greiða frá nýggja tvørfakliga PhD-skúlanum, A Changing Arctic, ið er við til at menna eitt nýtt ættarlið av granskarum.
Eisini kunna granskarar hjá Sjókovanum um verkætlanir og kanningar hjá Sjókovanum, m.a. oljunýtslu, taraaling, uppsjóvarfiskiskap, línufiskiskap, alternativ protein í matvøru- og fóðurframleiðslu og verju av lívmargfeldinum í havinum. Orðaskifti verður um, hvussu samstarvið millum gransking og vinnulív kann betrast.
Dagurin endar við einum práti við Anniku Sølvará, stjóra í Granskingarráðnum, sum tekur saman um dagin og hugleiðir um føroyska granskingarumhvørvið.
Í steðgunum er framsýning av vørum úr havinum, bæði frá føroyskum fyritøkum og Iceland Ocean Cluster. Eisini er tilfar um verkætlanir hjá Sjókovanum og samstarvsfeløgum at síggja.
Sí alla skránna niðast ella les meira á heimasíðuni hjá Sjókovanum.
Øll eru hjartaliga vælkomin! Ráðstevnan er ein frálíkur møguleiki at hittast og fáa íblástur, vitan og kjak um viðurskifti, sum eru týdningarmikil fyri menningina av okkara høvuðsvinnum. Tað er ókeypis at luttaka, men tilmelding er neyðug. Melda til her.
Vit gleða okkum at síggja tykkum.
Unn Laksá og Juliana Arias Hansen á stovningardegnum hjá Sjókovanum.
